தற்காலப் பொருண்மையியல் ஆய்வுக்குத் தொல்காப்பியத்தின் கருத்தளிப்பு

 திருக்குறளில் நீக்கலும் நீங்கலும்– வழக்குப் பொருண்மைஒப்பு நோக்கு

      ப. கொழந்தசாமி, தமிழியல் துறைத் தலைவர், அரசினர் ஆய்வு நிறுவனம், புதுச்சேரி.

        தமிழுக்கும் தமிழருக்கும் புகழீட்டி, மானுட மேன்மையை வாய்ப்பாக்குகின்ற   நன்மறையான திருக்குறள்,  மொழி மற்றும் இலக்கியத் தொழில்நுட்பத்தைச் செவ்வனே கையாண்டு படைக்கப்பட்டுள்ளது. வாழ்வியல் விழுமியங்களை விண்டுரைப்பதை முதன்மை நோக்கமாகக் கொண்டிருப்பினும், இலக்கிய உத்திகளும் நடையியல் நுட்பங்களும் திருக்குறளில் செறிந்து காணப்படுகின்றன. வழக்குச் சூழலுக்கேற்பவும் தொடர்ப் பொருண்மை/ பயன் மொழியியல் / நடையியல்/ குடிமையியல்/ எடுத்துரைப்பியல் நோக்கிலும் இத்தகைய கூறுகளை நுணுகி ஆராய்ந்து கருத்துணரவேண்டும். அப்போது படைப்பின் பெருமையும் விளம்பப்படுகின்ற விழுமியத்தின் சால்பும் தெளிவாகி, அறநெறியைப் பின்பற்றும் உள்ளார்வம் மக்களிடம் இயல்பாகப் பிறக்கும். அதனால் திருக்குறளை முறையாக உணர்ந்துகொள்ள மொழி, இலக்கண அமைப்புகளின் பொருண்மைத் தகைமையை அறிந்திருக்கவேண்டியது தேவையாகின்றது. இந்த நோக்கத்தில், அறவியல் வகுத்தற்கு நீக்கல், நீங்கல் ஆகிய துறைச்சொற்களை வள்ளுவம் இயக்கியுள்ள பாங்கைப் பகர்ந்து , இச் சொற்களின் வழக்குப் பொருண்மையை ஆய்வதாக இக் கட்டுரை இயல்கின்றது. இதன்மூலம் வள்ளுவ மாண்பினையும் அறவியலையும்  வெளிப்படுத்த இயலும். இந்தச் சொற்களின் மூலம் நடத்தை விழிப்புணர்வை  விதைக்க வள்ளுவம் விழைகின்றது என்பது இக் கட்டுரையின் கருதுகோளாகும்.

நீக்கல் – சொற்பொருள் :

 பன்மொழி மின்னியல் அகரமுதலியான விக்சனரி நீக்கல் என்னும் பெயர்ச்சொல்லின் பொருளாக நீக்குதல், அழித்தல்  ஆகியவற்றைச் சுட்டுகின்றது. செந்தமிழ்ச் சொற்பிறப்பியல் பேரகரமுதலி மாறுபட்ட ஐந்து பொருள் கூறி, அகற்றல், நீக்குதல், போக்கல், விலக்கல் ஆகிய பொருளை வழக்குப் பொருண்மை நோக்கில் குறிக்கின்றது.

            சாமி வேலாயுதம் தொகுத்த திருக்குறட் சொல்லடைவு (ப.173 ), துறத்தல், அகற்றல், நீக்குதல், போக்கல், விலக்கல் ஆகிய பொருளை வழக்குப் பொருண்மை நோக்கில் குறிக்கின்றது.

            இந்தப் பின்னணியில் , நீக்கல் என்னும் சொல் திருக்குறளில் வழங்கும் அட்டவணை வருமாறு:

குறள் எண்	வருகை	கருத்து
194	நன்மையின் நீக்கும்	விலக்கல்
327	தன்னுயிர் நீப்பினும்	போக்கல்
327	இன்னுயிர் நீக்கும்	போக்கல்
330	உயிர் உடம்பின் நீக்கியார்	போக்கல்
384	அல்லவை நீக்கி	அகற்றல்
436	தன் குற்றம் நீக்கி	துறத்தல்
442	உற்ற நோய் நீக்கி	விலக்கல்
685	தூவாத நீக்கி	விலக்கல்
787	அழிவனவை நீக்கி	விலக்கல்
920	திரு நீக்கப்பட்டார்	விலக்கல்
1160	அல்லல் நோய் நீக்கி	போக்கல்

          

நீக்கல் என்கின்ற சொல் நீப்பின், நீக்கப்பட்டார் என்றும், வினையெச்சம்; வினையாலணையும் பெயர்; வினைமுற்று  ஆகிய வடிவங்களிலும் வழங்கப்பட்டுள்ளதை மேற்படி அட்டவணையால் அறியலாம்.  இதனால் நீக்கல் என்கின்ற வினைச்சொல் வேறுபட்ட பொருளில் பயில்வதையும், சிறப்பாக அகற்றல், விலக்கல் என்னும் கருத்தில்    ’தேவையற்ற / அழிவை ஏற்படுத்துகின்ற ஒன்றைத் தன்னை அண்டாமல் விரட்டல்’ என்னும் விழிப்புணர்வை ஏற்படுத்த, பிறவினைச் சொல்லாகத் திருக்குறளில் ஆளப்படுவதையும் தெளியலாம்.  

நீங்கல் : சொற்பொருள்:–

பன்மொழி மின்னியல் அகரமுதலியான விக்சனரி நீங்கல் என்னும் வினைச்சொல்லின் பொருளாக விலகுதல், பிளத்தல்  ஆகியவற்றைச் சுட்டுகின்றது. செந்தமிழ்ச் சொற்பிறப்பியல் பேரகரமுதலி( ப. 131 ) மாறுபட்ட மூன்று பொருள் கூறி, அகறல், நீங்குதல் ஆகிய பொருளை வழக்குப் பொருண்மை நோக்கில் குறிக்கின்றது. சாமி வேலாயுதம் தொகுத்த திருக்குறட் சொல்லடைவு (பக்.173-174 ), அகறல், கெடுதல், இழத்தல், விலகல் ஆகிய பொருளை வழக்குப் பொருண்மை நோக்கில் குறிக்கின்றது.

நீங்கல் என்னும் சொல் திருக்குறளில் வழங்கும் அட்டவணை வருமாறு:

குறள் எண்	வருகை	கருத்து
98	சிறுமையுள் நீங்கிய இன்சொல்	துன்பம் தராத
154	நிறையுடைமை நீங்காது வேண்டின்	அகறல்
195	சீர்மை சிறப்பொடு நீங்கும்	அகறல்
246	பொருள் நீங்கி	அகறல்
246	அருள் நீங்கி	அகறல்
341	யாதனின் நீங்கியான்	தவிர்த்தல்
352	இருள் நீங்கி	அகறல்
352	மருள் நீங்கி	அகறல்
353	ஐயத்தின் நீங்கி	அகறல்
358	பேதைமை நீங்க	அகறல்
383	மூன்றும் நீங்கா	விலகல்
495	அடும்புனலின் நீங்கின்	அகறல்
502	குற்றத்தின் நீங்கி	அகறல்
519	நீங்கும் திரு	அகறல்
562	ஆக்கம் நீங்காமை	அகறல்
592	நில்லாது நீங்கிவிடும்	அகறல்
864	நீங்கான் வெகுளி	அகறல்
1104	நீங்கின் தெறூஉம்	விலகல்
1124	அன்னள் நீங்கும் இடத்து	விலகல்
1155	அவர்நீங்கின்	விலகல்
1216	காதலர் நீங்கலர்	விலகல்
1234	பணை நீங்கி	குறைதல்
1234	துணை நீங்கி	விலகல்
1265	நீங்கும் என் மென்தோள்	தீர்தல்

          நீங்கல் என்கின்ற சொல் நீங்கலர் என்றும், பெயரெச்சம்; வினையெச்சம்; வினைமுற்று, தொழிற்பெயர் ஆகிய வடிவங்களிலும் வழங்கப்பட்டுள்ளதை மேற்படி அட்டவணையால் அறியலாம்.  இதனால் நீங்கல் என்கின்ற வினைச்சொல் அறத்துப்பாலிலும் பொருட்பாலிலும் தீமையைத் தவிர்த்தல் என்கின்ற விழிப்புணர்வுத் துறைச்சொல்லாகவும்; காமத்துப்பாலில் பிரிவைச் சுட்டுகின்ற உளவியல் துறைச்சொல்லாகவும் வேறுபட்ட பொருளில் பயில்வதையும், சிறப்பாக அகறல், விலகல் என்னும் கருத்தில் ’தேவையற்ற / அழிவை ஏற்படுத்துகின்ற ஒன்றிலிருந்து தன்னை விலக்கிப் பாதுகாத்துகொள்ளல் என்னும் விழிப்புணர்வை ஏற்படுத்த, தன்வினைச் சொல்லாக முன்னிரு பால்களிலும், காமத்துப்பாலில் தலைமக்களுக்கிடையிலான பிரிவை உணர்த்துவதாகவும் திருக்குறளில் ஆளப்படுவதையும் தெளியலாம்.  

நீக்கல்; நீங்கல் ஆகிய துறைச்சொற்களின் வாயிலாகவும் திருக்குறள் மானுட மேன்மைக்கான விழுமியங்களை வழிமொழிந்துள்ளது. இவ்வாறு வள்ளுவ அறவியலை / நடையியலைச் சொற்பொருண்மை நோக்கில் அணுகினால் கருத்துத் தெளிவு சிறக்கும்.

                                                       பயன்பட்டவை

சாமி வேலாயுதம் ( 2005 ) , திருக்குறட் சொல்லடைவு, சென்னை; தென்னிந்திய தமிழ்ச் சங்கம்.

செந்தமிழ்ச் சொற்பிறப்பியல் பேரகரமுதலி, ஐந்தாம் மடலம், - இரண்டாம் பாகம், பக்.129-132. தமிழ் இணையக் கல்விக் கழக மின்னூலகம்.

விக்சனரி , பன்மொழி மின்னியல் அகரமுதலி, கூகுள் இணையதளம்.