தற்காலப் பொருண்மையியல் ஆய்வுக்குத் தொல்காப்பியத்தின் கருத்தளிப்பு

            வள்ளுவம் விண்டுரைக்கின்ற ‘ அரிது’ : சொற்பொருண்மை நோக்கு

முனைவர் ப. கொழந்தசாமி, அரசினர் ஆய்வு நிறுவனம், புதுச்சேரி

மானுட மேன்மையை நோக்காகக் கொண்ட வள்ளுவம் வாழ்க்கையின் இயல்பை எடுத்துக்கூறி, இந்த எண்ணம்/ செயல் தக்கது; வளர்ச்சிக்கானது; இனபம் பயப்பதோடு புகழை மிகுவிப்பது என்று ஊக்குவிக்கவும், இது தகாதது; துன்பத்தோடு பழியை ஏற்படுத்தவல்லது என எச்சரிக்கவும் செய்யும். இந்த வாய்பாட்டில் அரிது என்னும் சொல்லும் திருக்குறளில் ஆளப்பட்டுள்ளது.  அருமை என்னும் பண்படியாகத் தோன்றிய, அருமையானது ; கடினமானது; இயலாதது என்னும் பொருளுடைய அரிது என்னும் சொல், அரிதாக இருக்கும் என்ற பொருளுடைய குறிப்பு வினையாகவும்; அருமையானது என்னும் பொருளுடைய குறிப்பு  வினையாலணையும்பெயராகவும்; அரிதாக என்னும் பொருளுடைய குறிப்பு முற்றெச்சமாகவும் திருக்குறளில் இயல்வதை எடுத்துரைப்பதாக, சொல்லின் சூழல் பொருளை, இலக்கணக் குறிப்புடன் அறிந்தால் விழுமியம் தெளிவாகும் என்கின்ற கருதுகோளில் இக் கட்டுரை அமைகின்றது.  வள்ளுவத்தில்,  

07, 08, 16, 29, 101, 177, 213, 227, 235, 248, 377, 419, 443, 499, 503, 606, 647, 693, 745, 762, 823, 843, 886, 1049, 1153, 1155, 1156, 1180 ஆகிய குறட்பாக்களில் அருமையானது / இயலாது என்னும் பொருளிலும், 1160ஆம் குறட்பாவில் அருமையானது என்றும், 1276ஆம் குறளில் அரிதான என்னும் பொருளிலும்   ’அரிது‘ பயில்கின்றது. இதைப் பின்வருமாறு அட்டவணைப்படுத்தலாம்.

குறளெண்	சொல்லாட்சி	கருத்து	சொல் வகை
07	மனக்கவலை மாற்றல் அரிது	இறை நினைவு இல்லாவிட்டால் மனக் கவலை  தீர்க்க இயலாது	குறிப்பு வினை
08	பிறவாழி நீந்தல் அரிது	இறை நினைவு இல்லாவிட்டால் பிறவித் துன்பத்தைத் தொலைக்க இயலாது	குறிப்பு வினை
16	பசும்புல் தலைகாண்பு அரிது	புல் முளைக்காது	குறிப்பு வினை
29	வெகுளி கணமேயும் காத்தல் அரிது.	சினத்தை ந்ண்ட்டிக்க இயலாது	குறிப்பு வினை
101	ஆற்றல் அரிது	ஈடு ஆகமுடியாது	குறிப்பு வினை
177	மாண்டற் கரிதாம் பயன்	நல்லதாக அமையாது	குறிப்பு வினை
213	பெறலரிதே	பெற முடியாது	குறிப்பு வினை
227	பிணி தீண்டல் அரிது	நோய் தீண்டாது	குறிப்பு வினை
235	வித்தகர்க்கு அல்லால் அரிது	மற்றவர்க்கு இல்லை	குறிப்பு வினை
248	ஆதல் அரிது	ஆக இயலாது	குறிப்பு வினை
377	துய்த்தல் அரிது	நுகர இயலாது	குறிப்பு வினை
419	வாயினராதல் அரிது	இருக்க இயலாது	குறிப்பு வினை
443	அரிதே	இயலாதது	குறிப்பு வினை
499	ஒட்டல் அரிது	எளிதானது அன்று	குறிப்பு வினை
503	இன்மை அரிதே	இல்லாதிருப்பது அருமை	குறிப்பு வினை
606	பயன் எய்தல் அரிது	பயனை அடைய முடியாது.	குறிப்பு வினை
647	வெல்லல் யார்க்கும் அரிது	எவராலும் வெல்ல முடியாது	குறிப்பு வினை
693	தேற்றுதல் யார்க்கும் அரிது	தெளிவித்தல் எவர்க்கும் முடியாதது.	குறிப்பு வினை
745	கொளற்கரியதாய்	கைப்பற்ற முடியாததாக	குறிப்பு வினை
762	தொல்படைக் கல்லால் அரிது	வேறுபடைக்கு இருக்க முடியாது	குறிப்பு வினை
823	மாணார்க் கரிது	மாட்சியடையாதவர்க்கு இல்லை.	குறிப்பு வினை
843	செய்தல் அரிது	செய்யமுடியாது	குறிப்பு வினை
886	ஒன்றல் அரிது	ஒருபோதும் முடியாது	குறிப்பு வினை
1049	கண்பாடு அரிது	தூங்க இயலாது	குறிப்பு வினை
1153	அரிதரோ தேற்றம்	தெளிய இயலாது	குறிப்பு வினை
1155	அரிதால் புணர்வு	கூடுதல் எளிதல்ல	குறிப்பு வினை
1156	அரிதவர் நல்குவர் என்னும் நசை	அன்பு செய்வார் என்னும் ஆசை பயனற்றது	குறிப்பு வினை
1160	அரிதாற்றி	அரியவற்றைச் செய்து	குறிப்பு வினையாலணையும்பெயர்
1180	ஊரார்க்கு அரிதன்றால்	ஊரார்க்குக் கடினமன்று	குறிப்பு வினை
1276	அரிதாற்றி	அரிதாகிய பிரிவை	முற்றெச்சம்

 

அரிது என்னும் சொல்லால் விண்டுரைக்கலாகின்ற அடிப்படை விழுமியங்கள்:

Ø  இறை நினைவு நன்மையாக்கும்.

Ø  உலக வளமைக்கு மழை தேவை

Ø  சினம் நீடிக்கக்கூடாது

Ø   உதவியைப் பெரிதாகப் போற்றுக

Ø  பிறிரின் பொருளை விரும்பக்கூடாது

Ø  பகுத்துண்டு பல்லுயிர் ஓம்புக

Ø  புகழ் வாழ்வு வாழ்க

Ø  இரக்கம் கொள்

Ø  ஆன்றோர் அறவுரை போற்று

Ø  பெரியோரைப் போற்றி நட்பாகக் கொள்

Ø  கற்றோர்க்கும் அறியாமை இருக்கும்

Ø  சோம்பல் முன்னேற்றத்தைக் குறைக்கும்

Ø  திறனாளனை வெல்ல இயலாது

Ø  தலைவன் தன்னை ஐயுறாவண்ணம் நடக்கவும்

Ø  அரண் வலிமையும் வளமும் உடையதாக இருக்கவேண்டும்

Ø  தோல்வியால் துவலக்கூடாது

Ø  படிப்பு பண்பாட்டை வளர்க்கவேண்டும்

Ø  அறிவற்றோர் தமக்குத் தாமே தீங்குசெய்வர்

Ø  உட்பகை தீது

Ø  இல்லாமை கொடுமையானது

Ø  கணவர் பிரிவு துன்பமானது

Ø  உடல்மொழியின்/ மெய்ப்பாட்டின் கருத்தறிக

 

            இவ்வாறாக, அரிது என்னும் வினைச்சொல்லால் வள்ளுவம் வாழ்வியல் விழுமியங்களை விண்டுரைத்துள்ளது. இவ்வாறே, திருக்குறளில் இயல்கின்ற அறவியல் சொற்களை நோக்கினால் மனவளம் பெருகும்; மானுடம் வெல்லும்.

பயன்பட்டவை

தமிழ் இணையக் கல்விக்கழக நூலகம்

செந்தமிழ்ச் சொற்பிறப்பியல் பேரகரமுதலி, முதன் மடலம்- முதற்பாகம், தமிழ் இணையக் கல்விக்கழக நூலகம்.

                                                      ********