798ஆம் குறட்பாவின் பொருண்மையும் சமூக உறவியல் விழுமியமும்

                                     பேராசிரியர் குழந்தைசாமி, புதுச்சேரி

            ஒரு பனுவலில் பயில்கின்ற சொற்கள் அனைத்தும் பொருளுடையன; படைப்பாளரின் கருத்துகளை வாசிப்பார்க்குக் கடத்துவன. ஆயினும் சொற்களைத் தொடரில் அமைக்கின்றபோதே  சொல் உணர்த்துகின்ற கருத்துப் புலனாகும். அதோடு ஒரு தொடர் இயல்கின்ற சூழலும் நோக்கத்தக்கது. இதைப் பொருள் இலக்கணத்தில் திணை, துறை என்றும் திருக்குறளில் பால், அதிகாரம் என்றும் சுட்டுகின்றனர். எனவே ஒரு குறட்பாவை அது பயில்கின்ற அதிகாரத்தை நோக்கிப் பொருளுணரவேண்டும்.  அம் முறையில் ,

உள்ளற்க உள்ளம் சிறுகுவ; கொள்ளற்க
அல்லற்கண் ஆற்றறுப்பார் நட்பு ( 798 )

 என்னும் குறட்பாவை அணுகலாம். பொருட்பாலின் நட்பாராய்தல் அதிகாரத்தின்  எட்டாவது குறளான இதில்,

மனவெழுச்சியைத் தாழ்த்துகின்ற எண்ணங்களுக்கு வாய்ப்பளிக்காதே !

[அதைப் போல] துன்ப காலத்தில் உதவாத நட்பைத் தொடராதே!

 

என்னும் கருத்துடைய  இரு தொடர்கள் உள்ளன.  இதில் எடுத்துக்காட்டுவமை அணி  அமைந்துள்ளது. அதாவது அதைப் போல என்னும் ஒப்புமை இவ் இரு தொடர்களுக்கு இடையில் இயல்கின்றது.  இருமைப் பண்பை ஒப்பிட்டுக் காட்டுதல் வள்ளுவத்தின் இயல்பாகும். திருக்குறளின் முதற்குறளே இவ்வாறானது. அதற்கேற்ப இக் குறட்பாவில்  வாய்ப்பளிக்காதே: தொடராதே என்னும் இரண்டு வினைமுற்றுகள் / அறவுரைகள் உளவியல் & சமூக உறவியல் விழுமியங்களாக வகுத்துரைக்கப்பட்டுள்ளன. முன்னேற்றத்தைச் சிதைக்கின்ற எண்ணங்களுக்கு இடமளிக்கலாகாது, அவ்வாறே நண்பனின் பண்பை அறிவதற்குச் சில சூழல்கள் வாய்ப்பாகின்றன.  தன்னோடு இயல்பான சூழலில் நட்பாடுபவர், தான் துன்பப்படும்போது உதவாமல் இருந்தால் , அவர் உண்மையான நண்பராகக் கருதப்படமாட்டார். இக் குறட்பாவில் அமைகின்ற  உள்ளற்க / கொள்ளற்க என்னும் எதிர்மறை வியங்கோள் வினைமுற்றுகள் உன்னத்தக்கன. உள் + அல் + க / கொள்+ அல் + க என்னும் சொல்லாக்க  ஒட்டுமுறைக் கட்டமைப்பில், வினைப் பகுதியுடன், அல் என்னும் எதிர்மறை இடைநிலையும் க என்னும் வியங்கோள் விகுதியும் ஒட்டப்பட்டுச் சொற்கள் ஆக்கப்பட்டுள்ளன. இவை ஒவ்வொன்றும் ஒரு கருத்தை வெளிப்படுத்துகின்றன. இவண் ஆற்றறுப்பார் என்னும் பலர்பால் வினையாலணையும்பெயர்  உறுதுணையாகாமல் கைவிடுவோர் என்னும் கருத்தில் இயல்கின்றது. இவ்வாறாக, இரு கருத்துகளை இயைத்து உளவியல் & சமூக உறவியல், விழுமியங்களாக வள்ளுவம் அறமுரைத்துள்ளது. ஒவ்வொரு குறட்பாவையும் இங்ஙனம் பொருண்மை அறியின் வள்ளுவ வாய்மை தெளிவாகி மானுடம் வெல்லும்.

நன்றி: இணையத் தரவுகள்.

                                        --------------------

Comments

Post a Comment

Popular posts from this blog

தற்காலப் பொருண்மையியல் ஆய்வுக்குத் தொல்காப்பியத்தின் கருத்தளிப்பு

Image
        தற்காலப் பொருண்மையியல் ஆய்வுக்குத் தொல்காப்பியத்தின் கருத்தளிப்பு                                       ( முனைவர் ப. கொழந்தசாமி, புதுச்சேரி-605 008. பேச: 94863 66572 .)         தமிழின் தொன்மையான / தலைமையான இலக்கண நூலாம் தொல்காப்பியத்தில் எழுத்து சொல் ஆகிய அதிகாரங்களில் தமிழ் மொழியின் அமைப்புகளும் அவற்றின் இயங்கு முறையும், பொருளதிகாரத்தில் இலக்கியப் பொருண்மையும் விளக்கவியல் பாங்குடன் எடுத்துரைக்கப்பட்டுள்ளன. எழுத்து, சொல்   தொடர் ஆகியவற்றின் இலக்கணங்களை விளக்கும்போது மொழிப் பொருண்மைச் செய்திகள் ஆங்காங்கே தொல்காப்பியத்தில் சுட்டப்பட்டுள்ளன. இது குறித்துத் தொல்காப்பிய உரைகளில் காணப்படும் கருத்துகளையும் ஆய்வுக் கட்டுரைகள்/நூல்கள் கூறும் செய்திகளையும் தொகுத்து வகைதொகைப்படுத்தித் தனியான/முழுமையான ஆய்வை மேற்கொண்டால் அது இலக்கண இலக்கியப் புரிதிறனுக்கும் படைப்புக்கும் ஆய்வுக்கும் உறுதுணையாகும். மேலும் தமிழ் மொழிப்பொருண்மைக...
Read more
                                          பழந் தமிழில் ’நுனி’- கருத்தாய்வு ப. கொழந்தசாமி, அரசினர் ஆய்வு நிறுவனம், புதுச்சேரி உயர்தனிச் செம்மொழியான தமிழ் நீண்டு பரந்த வரலாற்றைக் கொண்டது. ஆயினும் பழந் தமிழ் வழக்காற்றை இன்றும் புரிந்துகொள்கின்ற வாய்ப்பும் உள்ளது. அந் நிலையில் ’நுனி ’ என்னும் மரத்தின் முனைப் பகுதியாக அமைகின்ற உறுப்பைக் குறிக்கின்ற ஒன்றன்பால் சினைப் பெயர் தொல்காப்பியம், சங்க இலக்கியம், திருக்குறள் ஆகியவற்றில் இயல்கின்ற பான்மையை எடுத்துரைப்பதாக இக் கட்டுரை அமைகின்றது. இதனால் பழந் தமிழ்ச் சொல்லாட்சியையும் அதன் பொருண்மைத் தொடர்ச்சியையும் அறியலாம். நுனி: சொற்பொருள் :             முதல், சினை என்று ஓர் உலகப் பொருள் இரண்டு நிலைகளில் வகைப்படுத்திப் பெயரிடப்படுகின்றது.  முதல் சினை உறவைத் தொல்காப்பியம் வேற்றுமை இலக்கணத்தில் விளக்குகின்றது. பொருண்மையியலிலும் இது ஆயப்படுகின்றது. சான்றாக,     ...
Read more
                                        பண்டு – நிலை மாற்றப் பொருண்மை புதுவை குழந்தைசாமி , பஞ்சலிங்கபுரம்                 தொல்காப்பியம் காலத்தை இறப்பு, நிகழ்வு, எதிர்வு என்று மூன்றாகப் பகுக்கின்றது.  இது இலக்கண விளக்கம் மட்டுமன்று; வாழ்வியல் விழுமியமும் ஆகும். அதாவது சென்ற கால மேன்மை தொடருமா ? மாறுமா?, மாற்றம் முன்னேற்றமாகுமா? போன்ற எண்ணங்கள் நிலையானவை; அனைவருக்கும் அனைத்திற்கும் பொருந்துபவை. இத்தகைய உலகளாவிய மாற்ற நிலையைக் காஞ்சி த் திணையில் தொல்காப்பியம் சுட்டுகின்றது. முன்னைய நிலையைச் சுட்ட முன்பு, பண்டு போன்ற சொற்கள் வழக்கிலும் செய்யுளிலும் தொன்றுதொட்டு ஆளப்படுகின்றன. இக் குறிப்புரை பண்டு என்னும் சொல்லால் வள்ளுவம் முன்னைய நிலை மாறியதைப் பதிவதை வெளிப்படுத்துகின்றது. காமத்துப்பாலில், பண்டறி யேன் கூற்றென் பதனை இனியறிந்தேன் பெண்டகையால் பேரமர்க் கட்டு (1083) நாணொடு நல்லாண்மை பண்டு டையேன் இ...
Read more